अंबाजोगाई (प्रतिनिधी) : केज विधानसभा मतदारसंघात आज पर्यंत झालेल्या निवडणूकीत उमेदवारी देताना एका विशिष्ट जातीला सर्वाधिक वेळा उमेदवारी व प्रतिनिधित्व मिळाले आहे. आपवादानेच इतरांना संधी मिळाली. त्यातही बौद्ध समाजाला म्हणावे तितकी संधी प्राप्त झाली नाही. केज विधानसभा मतदारसंघात बौद्ध समाजाची संख्या लक्षणीय आहे. त्यामुळे आगामी विधानसभा निवडणूकीत उमेदवारी देताना राजकिय पक्षांनी बौद्ध व्यक्तीला प्राधान्य द्यावे अशी मागणी काँग्रेस नेते अनंतराव जगतकर यांनी केली आहे. ते पत्रकार परिषदेत बोलत होते.
मागील काही दिवसांपासून अनुसुचित जाती राखीव केज विधानसभा मतदारसंघातून राष्ट्रीय काँग्रेसचे जेष्ठ नेते अ‍ॅड.अनंतराव जगतकर हे आगामी 2024 ची निवडणूक लढविणार असल्याची चर्चा ऐकावयास मिळत होती. त्या पार्श्वभूमीवर अ‍ॅड.जगतकर यांनी केज मतदारसंघातील प्रमुख नेत्यांच्या, सर्वसामान्य जनतेच्या आणि विविध समाज घटकांच्या गाठी-भेटी घेऊन त्यांच्या सोबत चर्चा सुरू केली आहे. हे त्यांनी अंबाजोगाई येथे बुधवार, दि. 7 ऑगस्ट रोजी आयोजित केलेल्या पत्रकार परिषदेतून दिसून आले.
अ‍ॅड.जगतकर हे काँग्रेस पक्षाचे निष्ठावंत नेते असल्याने त्यांनी महाविकास आघाडीकडे केजच्या राखीव जागेची उमेदवारी पत्रकार परिषदेच्या माध्यमातून मागितली आहे. यावेळी पत्रकारांशी बोलताना अ‍ॅड.जगतकर म्हणाले की, अंबाजोगाई येथील आनंद गॅस एजन्सीच्या माध्यमातून सर्वाधिक नागरिकांपर्यंत पोहोचण्याचे काम त्यांनी आपल्या सातत्यपूर्ण व तत्पर सेवेतून एक वितरक म्हणून केले आहे. अ‍ॅड.जगतकर यांनी 1978 साली मुंबई येथील नौकरी सोडून ते अंबाजोगाई येथे आल्यानंतर त्यांनी डी.एस.मुंडे, अ‍ॅड.वामनराव गंगणे, अ‍ॅड.सिद्धीकी, खतीब या चार-पाच सहकार्‍यांना सोबत घेऊन अंबाजोगाईत काँग्रेस पक्षाची शाखा स्थापन केली. पंजाच्या चिन्हावर अंबाजोगाई नगरपालीकेची निवडणूक लढवून त्यांनी पाच नगरसेवक निवडून आणले होते. त्यानंतर अ‍ॅड.जगतकर यांनी 1985 साली केज विधानसभेची निवडणूक लढवली होती. या निवडणूकीत त्यांचा अत्यल्प मतांनी पराभव झाला. या पराभवानंतर ही त्यांनी राष्ट्रीय नेत्या खा.सौ.रजनीताई पाटील व माजी मंत्री अशोकराव पाटील यांच्या नेतृत्वाखाली काँग्रेस पक्षाचे एकनिष्ठेने काम केले. आनंद गॅस एजन्सीच्या माध्यमातून केज व अंबाजोगाई तालुक्यात तब्बल 45 हजार लोकांशी ग्राहक म्हणून त्यांचा थेट संपर्क आहे. अशी माहिती देवून आपण काँग्रेस पक्षाकडे केज विधानसभा मतदारसंघात बौद्ध व्यक्तीला उमेदवारी द्यावी अशी मागणी केली. बीड जिल्ह्यात काँग्रेस पक्षाला बीड, केज आणि परळी या तीन जागा मिळाव्यात अशी काँग्रेस पदाधिकारी व कार्यकर्त्यांची भावना आहे. याचा उमेदवारी देताना विचार व्हावा असे सांगून अ‍ॅड.जगतकर म्हणाले की, पक्षाकडून आदेश आल्यास आपण केज मतदारसंघातून निवडणूक लढविणार आहोत. त्या दृष्टीने आपण तयार आहोत. 1978 पासुन राखीव असलेला केज मतदारसंघात विकासाची अनेक कामे होणे गरजेचे आहे. मतदारसंघात शेतीपुरक उद्योग, व्यवसाय उभारले पाहिजेत, शेतीला उद्योगाचा दर्जा मिळाला पाहिजे, संचिन प्रकल्प, वॉटरग्रीड सारख्या प्रकल्पाच्या माध्यमातून शेतीला पाणी उपलब्ध झाले पाहिजे. केंद्र व राज्य सरकारच्या वतीने मोठा प्रकल्प आल्यास बेरोजगारांना रोजगाराच्या हविपुल संधी उपलब्ध होतील. माजी केंद्रीय कृषीमंत्री खा.शरदचंद्रजी पवार आणि दिवंगत मुख्यमंत्री विलासरावजी देशमुख यांच्याकडे विकासाचा दृष्टीकोन असल्याने बारामती व लातूरचा वेगाने विकास झाला. असा दृष्टीकोन असलेला नेतृत्व केज मतदारसंघाला लाभणे गरजेचे आहे. प्रश्‍न मांडा, त्याचा पाठपुरावा करा आणि विकास खेचून आणा, हे तंत्र वापरून केज मतदारसंघ प्रगती पथावर आणता येईल. उमेदवारी देताना बौद्ध समाजाला का डावलले जाते ? हे लक्षात येत नाही. केज मतदारसंघात व बीड जिल्ह्यात काँग्रेसला, महाविकास आघाडीला अनुकुल वातावरण आहे. त्यामुळे आपण मागील काही दिवसांपासून मान्यवरांसह सर्वसामान्य मतदारांच्या गाठी-भेटी घेत आहोत. त्यांच्याकडून चांगला प्रतिसाद लाभत आहे. केज मतदारसंघात जनतेला नविन चेहरा हवा आहे. मी निवडणूक लढविण्यास इच्छुक आहे. मला सर्वधर्मिय समाज बांधवांचे समर्थन आहे., बौद्ध समाजाचा एक घटक म्हणून मी उमेदवारीची मागणी करीत आहे. काँग्रेस पक्षाने उमेदवारी दिली तर आपण महाविकास आघाडीच्या वतीने निवडणूक लढविणार आहोत असे अ‍ॅड.अनंतराव जगतकर यांनी सांगितले.
या पत्रकार परिषदेत काँग्रेसचे शहराध्यक्ष आसेफोद्दीन बाबा खतीब यांनी अ‍ॅड.जगतकर यांच्या मताशी आपण सहमत आहोत. आमचा त्यांना पाठींबा आहे. बीड जिल्ह्यात मराठा, मुस्लिम आणि बौद्ध समाजाला उमेदवारी देण्यासाठी आमचा पाठपुरावा सुरू आहे. बीड जिल्ह्यात काँग्रेसकडे जनाधार असल्याचे शहराध्यक्ष खतीब यांनी सांगितले. पत्रकार परिषदेस काँग्रेसचे माजी तालुकाध्यक्ष वसंतराव मोरे यांच्यासह काँग्रेसचे पदाधिकारी व कार्यकर्ते उपस्थित होते.
